By Abdirizak Diis,
Maxkamadda sare ee Maraykanka ayaa sheegtay Jimcihii in ay go’aan ka gaari doonto in madaxweynihii hore ee Maraykanka Donald Trump laga mamnuucayo doorashada soo socota ee dabayaaqada sanadkaan qabsoomaysa, sababtoo ah wuxuu isku dayay in uu afgambiyo doorashadii madaxwaynaha ee looga adkaaday 2020kii.
Garsoorayaasha ayaa garwaaqsaday baahida loo qabo in si degdeg ah go’aan loo gaaro, maadaama codbixiyeyaashu ay dhawaan bilaabi doonaan codaynta is reebreebka xisbiyada dalka oo dhan. Maxkamada ayaa aqbashay rafcaanka Trump ee kiis ka yimid gobolka Colorado oo ka dhashay doorkii uu ku lahaa weerarkii lagu qaaday US Capitol Jan. 6, 2021.
Iyadoo la tixgalinayo baahida degdegga ah kiiskaan, doodaha ayaa la qaban doonaa Febraayo 8deeda, oo ku aadan bisha fasaxa ay galaan garsoorayaasha. Waqtiga xaddidan wuxuu u oggolaanayaa maxkamadda inay soo saarto go’aan ka hor Super Tuesday March 5, oo ah maalinta codaynta ugu badan ay dhacdo.
Trump, oo ka hadlayay munaasabad olole oo ka dhacday Iowa, ayaa yiri: “Waxa kaliya ee aan doonayo waa cadaalad. Waxaan rajeynayaa inay cadaalad ahaan doonaan.
Maxkamadda ayaa markii ugu horeysay ka fiirsan doonta ujeedada farqo ka mid ah qodobka 14-aad ee dastuurka dalka kaas oo ka mamnuucaya qaar ka mid ah dadka ” kacdoonka sameeyay” inay qabtaan xafiis dadweyne. Qodobkaas waxaa dastuurka lagu daray lana ansixiyay 1868, ka dib Dagaalkii Sokeeye ee Maraykanka.
Maxkamadda Sare ee Colorado, ayaa 4-3 cod ku xukuntay bishii hore in Trump aanu ka qayb gali karin codbixinta hordhaca ah ee Jamhuuriga. Go’aanka ayaa ahaa markii ugu horeysay ee qodobka 14-aad loo isticmaalo in laga mamnuuco musharax madaxweynaha doorashada.
Trump ayaa racfaan kale gaystay maxkamada gobolka Maine ka dib go’aan ay soo saartay xoghayaha gobolka Maine, Shenna Bellows, kaas oo ahaa in uusan u qalmin in uu ka qayb galo codbixinta gobolkaas ee ku saabsan doorkii uu ku lahaa weerarkii Capitolka.
Xukunka maxkamada sare ee Colorado iyo go’aanka Xoghayaha Gobolka Maine ma dhaqan galayaan ilaa maxkamada sare go’aan ka gaarto keeska
