Ka dib bilooyiin badan oo dood ah iyo kumanaan naqshadadood oo ay dadwaynaha soo gudbiyeen, Minnesota ayaa yeelatay calan cusub oo astaan u noqon doona gobolka.
Guddiga loo xilsaaray dib u habeynta astaamaha gobolka ayaa ku heshiiyay nashqada kama danbaysta ah maanta oo Talaado ah. Calanka cusub ayaa leh qariirada Minnesota, buluug barax tiran, dushana ku leh xiddig siddeed geesood ah oo woqooyi u jeeda. Naqshada oo la fudaydiyay ayaa sidoo kale leh qayb adag oo buluug khafiif ah si ay u matasho biyaha Minnesota.
“Waxaan diirada saarnay waxa naga sooci kara calamada kale,” ayuu yiri Guddoomiyaha Guddiga Dib-u-qaabaynta Astaamaha Gobolka, Luis Fitch, oo jeediyay khudbad uu ku taageerayay naqshadda kama dambaysta ah, isagoo xusay in calanka ay ka muuqdaan buluug ad oo u taagan biyaha Minnesota ee wabiga Mississippi.
Soo saarista naqshadaan ayaa ka dhigaysa in gudiga ay ka gaarsiiyeen xiliga kama danbaysta ah ee sharci dejinta u qabatay in ay ku sameeyaaan calanka iyo shaabadda rasmiga ah ee Minnesota ka hor 1da janaayo, 2024. Gudiga ayaa haystay afar bilood iyo miisaaniyad dhan $35,000 si ay dib-u-habayn buuxda ugu sameeyaan calaamadaha gobolka markii ugu horreysay muddo 100 sano ka badan.
Qof kastaa kuma qanacsanayn xulashada kama dambaysta ah ama habraaca loo maray. Laba xildhibaan oo ka tirsan gudiga haseyeeshee aan cod lahayn ayaa qorshaynaya in ay soo gudbiyaan sharci faraya in nashqada kama dambaysta ah cod dadwayne la galiyo, inkasta oo ay jiraan su’aalo ku saabsan in taasi dastuuri tahay iyo in kale.
“Howshani waxaa ay ahayd in ay qaadato wakhti dheer, in dhamaan reer Minnesota laga qayb galiyo ayay ahayd” ayuu yiri Rep. Bjorn Olson, R-Fairmont.
Calanka cusub ayaa ah nooc uu soo gudbiyay Andrew Prekker, oo 24 jir deggan Luverne, oo wax yar uun laga badalay.
Naqshadaynta asalka ah ee Prekker waxaa ku jiray qariirada gobolka iyo Xiddigta Waqooyi ee cad ee ku xigta diilin cad, cagaar iyo buluug oo matalaya barafka, beeraha iyo biyaha gobolka. Laakiin badi xubnaha gudiga waxay door bideen in la baabi’iyo xariijimaha kuna bedelaan midab buluug ah oo adag si ay naqshadda oga dhigaan qaabka ugu fudud.
