Guddiga gaarka ah ee Gov. Tim Walz ee loo xilsaaray In ay ka shaqeeyaan xal u helida muranka hareeyay ujrada darawalada Uber iyo Lyft ayaa waxyaabo badan isku diidan xili waqtiga kama danbaysta ah ee talooyiinka loogu gudbin lahaa Walz ay soo dhawaatay.
Guddigaan ayaa looga fadhiyaa in ay Walz u gudbiyaan talooyiinkooda 1da Janaayo 2024, si ay uga caawiyaan Sharci-dejinta 2024 sidii ay u soo saari laheen sharci lagu maamulo mushaharka iyo ilaalinta goobta shaqada darawallada rideshare. Guddigaan waxa ay kulmayaan hal mar oo kale—Disembar 19—keeda ka hor inta aan la gaarin waqtiga kama dambaysta ah.
Daqiiqado ka hor inta aysan shirin galabnimadii Talaadada, xubnaha gudigaan gaarka ah ee ka kooban SEIU Local 26 iyo Minnesota Uber/Lyft Drivers Association (MULDA) ayaa qabtay shir jaraa’id oo ay ku shaaciyeen soo jeedintooda.
“Waxaan diyaar u nahay in aan wadaxaajood galno, kana hadalno sidii aan xal u heli lahayn” ayuu yiri Eid Ali, gudoomiyaha MULDA.
Walz ayaa dhisay gudigaan todobaadyo kadib markii uu diiday in uu saxiixo sharci dabayaaqadii bishii May kaas oo Sharci dejinta Minnesota meel mariyeen oo mushahar kordhin loogu samayn lahaa darawalada gobolka oo dhan.
Tan iyo markii gudigaan howsha bilaabeen, darawalada qaar ayaa ka go’ay MULDA waxayna hadda dalbanayaan in wakiil loogu daro gudiga wada xaajoodka, iyo sidoo kale in gudiga Minneapolis ee ka shaaynaya sharciyada magaalada ee kordhinta mushaharka rideshare lagu daro.
Ciid ayaa qiray Talaadadii in qaar ka mid ah xubnihii hore ee MULDA ay ka baxeen, laakiin wuxuu sheegay in inta badan darawaladu ay midaysan yihiin.
“Waxaan haysanaa kalsoonida boqolkiiba boqol dhammaan darawalladii nala joogay labadii sano ee la soo dhaafay, wax walbana waxay u muuqdaan kuwo aad u wanaagsan,” ayuu yiri Ciid.
Qareenka MULDA Stephen Cooper ayaa sheegay in xubnihi hore ay hadda la baxayaan magaca ” MULDA Members,” kaas oo abuuraya jahwareer.
MULDA Members ayaa carqaladeeyay shirkii hore ee guddiga, laakiin ma aynan iman Talaadadii.
Xubnaha gudiga gaarka ah ee Walz ayaa talaadadii ka dooday daah-furnaanta mushaharka, taageerada darawalka, iyo nidaamka cadaaladda ee la xidhiidha hawl-joojinta, taas oo ah marka shirkadaha rideshare ay ka saaraan darawallada aaladahooda arrimo ay ka mid yihiin ra’yi celinta macmiilka. Guddigan ayaa sidoo kale ka hadlay sidii darawallada lacag loogu siin lahaa ku laabashada halkii ay ka yimaaddeen ka dib marka ay dejiyaan macmiilka, iyo arrimo kale oo hufan oo ku saabsan mushaharka.
