Dugsiyada dadwaynaha magaalada Minneapolis ayaa ka laabtay go’aankoodii ay ku joojinayeen barashada Afka-Hooyo oo ay ku jiraan afafka Soomaaliga iyo Hmong. Waxaa ay jareen qaar ka mid ah macalimiintii dhigayay iyo maamulkii ka shaqaynayay in Manhahka Afka-hooyo ka hir galo degmada. Maamulka degmada ayaa sabab oga dhigay dhaqaalo yari soo wajahday degmada.
Cadaadis ka yimi dadwaynaha gaar ahaan waalidiinta Soomaalida iyo Hmong oo ay weheliyaan shaqaalaha Soomalida ah ee ka shaqeeya degmada ayaa ku qasbay in ay ka laabtaan go’aankooda.
Maareeyaha guud ee dugsiyada dadwaynaha magaalada Minneapils Dr. Sayles Adams ayaa ka sheegtay kulankii gudoonka degmada talaadadii in go’aankaasi laga laabtay. Dr. Adams ayaa raali galin buuxda ka bixisay jahwareerka.
Waxaa ay gudoonka hortiisa ka tidhi “Lama jari doono shaqaalaha degmada ee isku dubarida barashada Afka-hooyo iyo kuwa ka shaqeeya qaadashada shahaadada Seals. Seals waa shahaado ay bixiso waaxda waxbarashada ee Minnesota.”
“Ka raali ahaada jahwaereerka iyo walwalka buslhada ku dhacay labadii usbuuc ee la soo dhaafay.”
Ka laabashada go’aanka ayaa yimi ka dib markii ay cadaadis kala kulmeen waalidiin iyo macalimiin jaamacadeed oo is abaabulay iyo waliba su’aalo adag oo uu waydiiyay Abdul Abdi oo ah gudoomiyaha gudiga dhaqaalaha lagana soo doorto degmada 1aad.
Deeqa Muhiyidiin ayaa talaabadani ku tilmaamtay in ay tahay wixii ay ku taamaysay. “In ka yar hal usubuuc, waalidiinta waxay awood u yeesheen in ay u doodaan xaqooda soona dhacsadaan.” Deeqa waa isku dubaridaha manhajka barashada Af-ka Soomaaliga waxayna ka mid ahayd shaqaalihii jagadooda la gooyay.
Inkastoo la soo celiyay dhamaan shaqaalihii ku hawlanaa barida iyo isku-duba ridka barashada Afka-hooyo, waxaa wali la hubin halka uu ku danbayn doono agaasimaha guud ee waaxda luqadaha badan “Multilingualka” Muhidiin Warfaa. Soomaalida ayaa wali wada dadaalkooda ay ku doonayaan in ay badbaadiyaan jagada Muxiyidiin sababtoo ah waa maskaxda ka danbaysay in manhajka Soomaaliga lagu daro manaahijta degmada.
