Booliska magaalada Minneapolis ayaa bilaabay baaritaan ku aadan dab qabsaday Masjid Al-raxma, kaasoo baabi’iyay saddex garaash, sidoo kalena burbur xooggan gaarsiiyay guri deris la ahaa masjidka. Dabkan oo dhacay 3-dii November, ayaa walaac ku abuuray bulshada Muslimiinta ah ee deegaanka.
Iyadoo wali baaritaan lagu hayo sababta dabkan dhalisay, golaha Iskuxidhka Maraykanka iyo Islaamka ee loo yaqaan (CAIR-MN) qaybta Minnesota ayaa ka codsaday booliiska in ay baaraan suurtagalnimada in ay jirto nacayb. Si kastaba ha ahaatee, booliiska Minneapolis ayaa tilmaamay, in hadda, aysan jirin wax muujinaya in nacayb uu jiro.
Aaron Rose oo u hadlay booliiska ayaa sheegay, “in gal baaritaan la furay walina socdo, uma eka inay ahayd mid laga shakiyo ama eex ku salaysan, laakiin waxaan hubaal ah inaan baarayno dhammaan sababaha oo aan u qaadaneyno si dhab ah. wax walbana way socdaan.”
Agaasimaha fulinta ee hay’adda CAIR-MN, Jaylaani Xuseen, ayaa walaac xooggan ka muujiyay dhacdadan, gaar ahaan xiisadda taagan ee ka dhalatay colaadda Israa’iil iyo Xamaas. Xuseen waxa uu iftiimiyay wakhtiga lagu aadiyay dabka oo ku soo beegantay mudaharaadyo lagaga soo horjeedo booqashadii madaxweyne Joe Biden iyo dab hore loo qabadsiiyay isla masjidkaan.
CAIR-MN waxa ay sheegtay in qiyaasta khasaaraha ka dhashay dabka uu kor u dhaafayo $100,000, taas oo sii kordhinaysa culays dhaqaale oo ay xarunta hore u soo wajahday dhacdadii tan ka horeysay. In kasta oo ay booliisku xaqiijiyeen in dabka aan loo arkin mid laga danbeeyay, Jaylaani Xuseen ayaa ku nuux-nuuxsaday badqabka bulshada, isagoo ku baaqay in la helo macluumaad dheeraad ah si loo sugo amniga mustaqbalka.
Walaaca ku saabsan kororka Islaam nacaybka ka dib dhacdooyinkii ugu dambeeyay ee caalamka ayuu ka dhaqaajiyay Hussein, wuxuuna ku booriyay xubnaha bulshada inay bixiyaan wixii xog ah ama ay duubeen kamerooyinka ilaalada.
Isagoo ka jawaabaya dhacdadaan, Xuseen ayaa codsaday in dhaqaale lagu taakuleeyo masjidka si dib loogu dhiso.
Booliska Minneapolis ayaa xaqiijiyay in baaritaan buuxa lagu sameynayo dhacdadan, iyagoo baaraya dhammaan waxyaabaha keeni kara in lagu ogaado waxa sababay dabka. Qofkii haya xog ku saabsan dabkii dhacay, waxaa loogu baaqayaa inay si degdeg ah ula soo xiriiraan laamaha amaanka.
Sheekadan waxa soo tebisay oo xaqiijisay Sahan Journal.
