Shaqaale badan oo ka shaqeeya xarumaha dadka waawayn lagu xanaaneeyo ayaa u asteestay Maarso 5teeda in ay sameeyaan 24 saacadood oo shaqo joojin ah.
Shaqo joojintaan ayaa qayb ka ah shaqo joojin ay samaynayaan dhamaan shaqaalaha adeega ee ururka (SEIU) iyo ururrada kale ee Minnesota iyo qaar ka mid ah shaqaalaha aan ka tirsanayn ururada oo samaynaya shaqo joojin horaanta Maarso.
Madaxa daryeelka caafimaadka ee SEIU Minnesota Jamie Gulley ayaa sheegay in 1,000 shaqaale oo ah kalkaaliyaasha xanaaneeya dadka waayeelka ah ay ka qayb qaadan doonaan.
Gulley ayaa yidhi “Ma jiro wax horumar ah oo laga gaaray gorgortanka,”
SEIU Healthcare Minnesota and Iowa iyo United Food and Commercial Workers 663 ayaa ku gorgortamaya inay shaqaalahooda helaan mushaarkordhin, caymis caafimaad oo la awoodi karo, hawlgab iyo shaqaale kordhin, hogaamiyayaasha ururka ayaa ku sheegay shir jaraa’id oo Khamiistii ay qabteen.
Shaqaaluhu waxay codsadeen in la siiyo mushaharka ugu yar ee ah $25 saacadii. In ka badan kala bar shaqaalaha ayaa weli qaata wax ka yar $20 saacaddii, ayuu yiri Gulley.
Monyou Taye, oo ah kalkaaliye iyo wakiilka ururka ee St. Therese of New Hope, ayaa ka hadashay Talaadadii baahida loo qabo kordhinta mushaharka. Waxay sheegtay in mushaharku uu ka caawin karo sii haysashada shaqaalaha iyo fududaynta culayska shaqada.
“Waxaan dareemaynaa culays, waxayna naga dhigaysaa dad xanaaqsan maadaama aan wajahayno xaaladaan adag. Waxaan u baahanahay mushahar kordhin,” ayay tidhi Taye.
Sannadkii hore, sharci-dejinta Minnesota ayaa abuurtay guddi awood u yeelan doona inuu baaro xaaladaha shaqada, iyo dejiyana mushaharka ugu yar ee shaqaalaha xanaanaynta waayeelka. In gobolku dejiyo halbeegyada ugu hooseeya waxay siinaysaa ururrada awood dheeraad ah oo ay si wadajir ah ula gorgortamaan loo shaqeeyayaasha.
Gulley wuxuu sheegay in ururadu aysan sugi karin isbedelada ka imaanaya guddiga, si kastaba ha ahaatee. Sida ugu dhaqsiyaha badan ee ay u dhaqan galayaan waa Janaayo 1deeda, 2025, ayuu yidhi.
Sida uu qabo sharciga Minnesota, ururadu waa inay bixiyaan ogeysiis 10 maalmood ah ka hor intaysan shaqo joojin sameyn. Gulley waxa uu sheegay in shaqaalaha xanaanada dadka waawayn ay si buuxda ugu diyaar garoobeen shaqo joojinta dhacaysa Maarso shanteeda.
