Shan masaajid oo ku yaala magaalooyiinka mataanaha ah, oo ay ku jiraan laba masaajid oo la weeraray sannadkii hore, ayaa helay deeqaha FEMA si ay ugu bixiyaan sugida aminga masaajida.
Masaajida la beegsaday waxaa ka mid ahaa masjid Assunnah Islamic Center, Masjid Al-Rahma, Masjid Omar ee ku yaala 24 mall, iyo Masjid Al-Towhiid oo dhamaantood ku yaala magaalooyiinka mataanaha ah.
” Weerarka wuxuu nagu reebay argagax, intaa wixii ka danbeeyayna waxaan galnay feejignaan,” ayuu yiri Imaam Cabdullaahi Nuur.
Burburkii loo gaystay Masjid Assunnah wuxuu gaystay khasaare lagu qiyaasay $10,000 — marka lagu daro kharashka hagaajinta.
Sideed bilood ka dib, jamaacada masaajidka wali feegignaan ayay ku jirtaa sida uu sheegay Imaam Cabdullahi Nuur oo loo yaqaan Sheikh Abul-fadli.
Mudo afar todobaad gudahood bilihii April iyo Maajo ee sanadkii la soo dhaafay, afar masaajid ayaa lagu bartilmaameedsaday dab iyo burbur, waxaana ka mid ah Masjid Omar Islamic Center iyo Masjid Al Rahma ee Minneapolis, As Sunnah iyo Oromo American Tawhid Islamic Center ee St. Paul.
Ilaa 11 masaajid oo ku yaalla gobolka Minnesota ayaa la burburiyay ama la dhibaateeyay 18-kii bilood ee ugu dambeeyay, taasoo qayb ka ah mowjado weeraro ah oo aan horay loo arag, sida uu noo sheegay Maxamed Ibraahim, oo ah agaasime ku xigeenka qaybta Minnesota ee Golaha Xiriirka Islaamka iyo Maraykanka (CAIR-MN).
Sida Masjid Assunnah, Masjidka Daar Al Qalam, Masjid Al-Ansar Islamic Community Center, iyo Masjid Ramadaan Center oo ku yaala St. Paul, midkiiba waxa la siiyay $150,000. Daar Cumar Al-Faaruuq waxa la guddoonsiiyey $4,000.
Shan iyo toban kaniisad oo Minnesota kuyaal, macaabida yuhuuda, iyo hay’ado aan faa’iido doonka ahayn ayaa sidoo kale helay deeqda.
CAIR-MN waxay ka caawisay masaajidda qorida codsiga sannadkii hore; Maxamed ayaa uu sheegay in ay nasiib darro tahay in shan masjid kaliya ay deeqaha helaan.
“Masaajidyadu waa meelaha ay bulshadeenu ku dareemeyso ammaan iyo lahaanshaho. Ma aha oo kaliya goob cibaado, laakiin sidoo kale waa goob waxbarasho, isu imaatin bulsho, iyo [goob ay tahay in dadku] dareemaan ammaan,” ayuu yidhi.
Imam Mohammed Dukuly, oo ah maamulaha Masjid Al-Ansar, ayaa sheegay in masaajidka la weeraray dhowr jeer sannadkii hore, dhibaatada loo gaystayna loo gudbiyay sharci fulinta.
“Waxay si weyn kor ugu qaadi doontaa awooddayada si aan u sugno ammaanka iyo ammaanka qof kasta oo misaajidka imaada,” ayuu ku yiri war-saxaafadeed.
Dar Al Qalam oo ku yaala Minneapolis ayaa marar badan dhibaato loo gaystay, oo ay ka mid tahay rasaas lagu dhuftay daaqadda masaajidka, sida uu noo sheegay Sheikh Cabdifataax Mursal.
Dhammaan masaajidda la beegsaday ma helin deeqda. Masjid Cumar, Masjid Al Rahma, iyo Xarunta Tawxiidka ayaanan helin deeqdaan. Masjid Al Rahma oo ku yaalla koonfurta Minneapolis ayaa laba jeer uu dab qabsaday 2023. waxaana xarunta Tawxiid soo gaaray burbur xooggan kaddib markii dab la qabadsiiyay Maajo 17, 2023.
