Gawaari badan ayaa isku dhacay qaar kalena wadada ayay ka baxeen subaxnimadii Jimcaha kadib markii baraf dhawr inchi ah uu ku da’ay wadooyiinka.
Ciidamada gobolka Minnesota ee loo yaqaan State Troopers ayaa ku soo qoray X (Twitter) inta u dhaxaysay 5tii galabnimo Habeenimadii Khamiista (markas oo uu baraf fudud bilaabmay) iyo 6 subaxnimo jimcaha ay ka jawaabeen 175 shil, 19 ka mid ah ayaa dhaawac gaystay. Halka 101 baabuur oo kale ay wadada ka baxeen, waxaana la soo sheegay in sadex taraak ay shil galeen.
Barafka da’ay habeenimadii Khamiista ilaa subaxnimadii jimcaha ayaa ah kii ugu horeeyay labo baraf oo la filayo in ay da’aan usbuucaan . Shaqaalaha iyo gawaarida barafka xaaqa ee MnDOT ayaa habeenkii oo dhan shaqaynayay. Waxaa ay ku soo waramaayan in wadooyinka ay simbiriraxo badan lahaayeen oo sababtay in gawaari badan ay wadada ka baxaan.
Koonfurta metro, oo u dhaw Albert Lea, saraakiishu waxay xidheen dhanka galbeed ee Interstate 90 shil halis ah oo dhacay dabayaaqadii Khamiista. Ciidamada gobolka ayaa sheegay in nin 51 jir ah oo reer Iowa ah uu dhintay ka dib markii gaadhiga uu watay uu ku dhacay taraak. Darawalkii waday gaariga xamuulka ah, oo ah haweeney 60 jir ah oo ka timid Oklahoma, ayaa isbitaal la dhigay iyadoo ay soo gaartay dhaawacyo aan halis ahayn. Waaxda Gaadiidka ee Minnesota ayaa sheegtay in gaadiidka loo weeciyay inta u dhexeysa Highway 13 iyo South Broadway Ave. ilaa baaritaanka laga soo gabagabeynayo oo laga nadiifinayo goobta.
Digniinaha la xiriira halista hawada ayaa ka dhaqangalaysa badi badhtamaha iyo koonfurta bari ee Minnesota ilaa 10ka subaxnimo ee Jimcaha maadaama barafku da’ayay habeenkii oo dhan.
Baraf kale oo aad u wayn ayaa la filayaa in uu da,o Axada nagu soo aadan.
