Maamulka Magaalada Minneapolis ayaa burburinya guryaha hoylaawayaasha koonfurta Minneapolis markii labaad bishan.
Xerada E. 26th Street iyo 14th Avenue S. ee la burburiyay Talaadadii waxaa sameeyay dadkii deganaa Camp Nenookaasi oo Janaayo 4teedii la xiray. Xerada cusub ayaa ka sameysan laba baloog oo koonfur ka xigta Camp Nenookaasi. Labada deegaanba waxaa u badnaa dadka asaliga Amerikaanka ah.
Warbaahinta ayaa loo oggolaaday inay u galaan xerada xiligii xiritaanka. Tiro kooban oo mutadawiciin ah ayaa sidoo kale loo oggolaaday inay dhaafaan xeendaabka booliiska si ay uga caawiyaan dadkii deganaa guuritaanka.
Isku dubaridaha kaamka ayaa sheegay in aysan jirin wax qorshe ah oo dadka degan xerada loogu rarayo meel saddexaad, mana cadda halka ay aadi doonaan dadkii degganaa xerada.
Guddoomiyaha Badbaadada Bulshada Todd Barnette ayaa shir jaraa’id oo uu qabtay Talaadadii ka sheegay in xerada labaad iyo Camp Nenookaasi ay ka jireen arrimo caafimaad darro iyo nabadgalyo xumo, oo ay ku jiraan hanjabaado dil ah, burbur hantiyeed, daroogo xad dhaaf ah, iyo isticmaalka fentanyl.
Nin 29 jir ah oo aan la aqoonsan ayaa lagu toogtay Isniintii waddada E. 26th oo ka baxsan xerada, waxaana toogtay nin looga shakisan yahay inuu “ka soo baxay” xerada, ayuu yiri Barnette. Ninka ayaa waxaa soo gaaray dhaawacyo aan halis ahayn, waxaana loo qaaday isbitaalka; Ma jirto cid loo qabtay kiiska ilaa subaxnimadii Talaadada.
Barnette waxa kale oo uu sheegay in waaxda caafimaadka ee magaaladu ay la socotay tayada hawada agagaarka xerada, dab ka kacay xerada awgeed. Magaaladu waxay qiyaastay in ilaa 25 qof ay ku noolaayeen xerada labaad.
Sarkaalka Hawlaha Magaalada Margaret Anderson Kelliher ayaa sheegtay in Avivo, oo ah hay’ad aan faa’iido doon ahayn oo loogu talagalay in lagu soo afjaro hoy la’aanta, ay hayso 20 sariirood oo dheeraad ah oo ay ugu talo gashay dadkii degganaa Camp Nenookaasi markii la xidhay. Si kastaba ha ahaatee, waxay aaminsan tahay in aan dhammaan sariiraha la isticmaalin.
“Waxaa jiray 80 ilaa 90 sariirood oo la heli karo habeen kasta tan iyo bilawgii Janaayo, macluumaadkaasina wuxuu si toos ah uga imanayaa dashboardka kooxda wacyigelinta ee Degmada Hennepin,” Kelliher ayaa tidhi. “Waan ogahay in samefalayaasha ay si adag u shaqeeyeen si ay goobaha ay maamulaan uga dhigaan kuwo ammaan ah si ay u caawiyaan dadka, waxaa jiray waqti laga yaabo inaysan sidaas ahayn.”
Kelliher waxay sheegtay in ay u badan tahay in magaaladu ay ku bixisay “boqolaal kun” oo doollar si loo loo xiro Camp Nenookaasi iyo xerada labaad.
Mar la weydiiyay sida ay magaaladu uga jawaabi doonto haddii xerada labaad ay u guurto meel cusub, Kelliher waxay tidhi, “Waxaan u maleynayaa inay danta ku jirto inaan la helin xero kale oo wayn oo loo guuro.”
